KIDUNG LUMAYUNG

= KIDUNG LUMAYUNG =

Lagu kidung ngalanglaung

Panundung bingung kaliwung

Pamentung laku kapahung

Kaambung ka awang-uwung

Papayung para pangagung

Nu manggung tur hurung nangtung

Malar jucung, sangkan nanjung

Henteu linglung kapidangdung

Pangagung miyuni layung

Ngempur hurung luhur gunung

Getih, daging, sungsum-balung

Parungrum juntrung sakurung

Gandrung liwung nu linuhung

Gumulung tungtung jajantung

Nalikung jadi pangjurung

Ngalarung tujuh lulurung

Lemah cai nu kawarti

Pertiwi nu sugih mukti

Bukti kaasrian Gusti

Nu misti dipusti-pusti

Kiwari ilang raspati

Kumargi kirang gumati

Jati kasilih ku junti

Nganti-nganti pangabakti

Peurih salebeting galih

Kasedih teu euih-euih

Pupulih leungit ka matih

Malih muih, nurih getih

Aji paripih kabintih

Kalindih henteu katolih

Nyukrih mambrih répéh-rapih

Teu kapanggih ku pangampih

Rahayat katalangsara

Malarat, lara-tunggara

Aparat ilang komara

Kasibat jeung nyaliara

Gara-gara saniskara

Munara teu kapiara

Mutiara mancawura

Nagara sirna cahara

Sumpah panulah musibah

Moal milampah pamondah

Pamolah wadah anugrah

Tarékah, sadrah, sumerah

Pamarentah teu awuntah

Para somah leah manah

Ibadah fisabilillah

Genah, betah, tumaninah

Pamungkas:

Saliring-liring dumadi

Éling ka Hyang Maha Widi

..CAG..