SIMBOL DINTEN-DINTEN

SIMBOL DINTEN-DINTEN

Salam kasadayana Baraya,ieu mah mung ukur ngiringan ngawurkeun wawangi na titinggal karuhun,nyaeta warisan kalinuhungan luluhur KISUNDA,dina ngama’naan falsafah sarta ajen –inajen KaManusaan sugan manawi kaanggo tur manpaat dina nata na-diri,nata jiwa,nata Raga-na,nata na-Gara,mugya jaya SILIH-WANGI di bwana ,nanjeurkeun Ka-Raharjaan tur Ka-Rahayuan ,,, Mugia _/\_

I. Simbol Dinten , Naktu na :

1. SENEN, simbolna KEMBANG- prak geura pelak Kembang malati anu ligar dina ati, campaka nyampakna dada, bawa lempang lir panganten anyar anu pinuh ku suka bungah...ucap salam laku lampah teu weleh ku sumebarna wawangian., mangka urang bakal nampi salam kawilujengan.

**NAKTU = 4

2. SALASA, salasa sipatna teh Seuneu.., leutik jd batur poek, gede jd amarah...sing ati2 dina lalampahan ngagunakeun " seuneu ". Mugia dinten ieu urang tiasa masihan teuleub haneutna keukeup tur nyandak caang kabalarea…

**NAKTU = 3

3. REBO, rebo lambangna DAUN nu gaduh pasipatan ngaiuhan, nandean mentrangna panon poe sareng cai hujan, ngabagikeun kanu dahan-tangkal tuluy ka akarna tug dugi kanu taneuh pikeun lumangsungna kahirupan,. Daun mah lungguh tur saimbang, pucuk jd ubar, garing jd pupuk. Mugia urang tiasa diajar kahirupan tina daun, hirup manfaat tileuleutik, gede jd pangayom anu adil.

Wilujeng .. mancen damel sing laksana sagala paneda.

**NAKTU = 7

4. KEMIS, simbolna ANGIN, miboga pasipatan nepikeun jeung nepakeun kahirupan, Nyarengan gentra haleuang ngadalingding beurang jeung peuting Nyekel pancen tugas mulya, hiliwirna panggeuing hariring ati anu matak tingtrim kana ati, gumuruhna matak keueung ngageterkeun raga, ngagerak sagara, ngarojong sagala upaya, angin mawa sora bathin jadi lisan, lisan jadi bewara.

Wilujeng dinten Kemis....mugia AMANAH sagala pancen.

**NAKTU = 8

5. JUM’AT  lambangna CAI,  cai datangna tluhur kahandap, tihandap kaluhur mangrupa ibun. Cai ngawujud kumaha wadahna (beradaptasi),dina rupa-rupa bentuk, kitu oge ngarana gumantung kana patempatan jeung samara anu dikandungna, aya cai laut, cai hujan, cai leuncang,...jst. 75% dina diri urang aya cai anu disamaraan ku yakin, kiruh jeung herangna cai dina diri gumantung ucap jeung pikirna nu ngajadikeun  laku lampahna da cai mah nurut kana aturan jalana dina mengkol milu mengkol dina nyurup milu nyurup.

 Wilujeng dinten Jum’at...mugia  urang salawasna dijantenkeun jalmi anu clak putih clah herang, lantip pikir wening ati.

**NAKTU = 6

6. SAPTU, simbolna  TANEUH/BUMI anu jadi titincakan urang hirup, nyumponan sagala tarekah manusa, benghar  ku sagala eusina pikeun dimanfaatkeun samustina, ,  Bumi muter dina porosna nu hartosna bumi mah istiqomah, panjeg dina galurna, muterna mere kasaimbangan pikeun napak dialam dunya,tp  Bumi ge bakal ngadakwa  kanu sarakah komo ngaruksak kana teu amanah

 Wilujeng dinten Saptu...mugia urang sadaya Panceg dina galur ..maslahat pikeun sasama.

**NAKTU = 9

7. MINGGU simbolna MEGA atawa AWAN anu cicingna aya diluhur, “ nembrak tara dibuni-buni”, bodas nyacas lir kapas sutra lalambaran mawa endah satukembing langit nu jadi saksi  sagala laku...Mega mawa beja ku robahna warna...pikeun ngelingan manusa datangna salin carita.

 Wilujeng dinten minggu....Mugia urang kalebet insan anu JUJUR , eces balaka nu  dipulas ku endahna rasa….

**NAKTU = 5

Wilujeng nyeubarkeun wawangi …

Haturnuhun kasadayana …. Mugya manpaat

Salam Rahayu _/\_

*** CAG ***

Di edit deui Ku : Rulii Hermawan Permana

Sumberna Ti : Robby Maulana Dzulkarnaen