Panggeuing Éling Waspada Tingal Permana

Panggeuing Éling Waspada Tingal Permana :

Iblis, nyaéta cahaya beureum kasajatian seuneu nu nganyawa nitis di alam ma’rifat tangtungan

jatidiri nyawa adam nu ngabuahkeun kakuatan nafsu, jadi amparan lampah upaya dina kabéngkokan

dina wangunan kahirupan nyawa adam.

Sétan, nyaéta kasajatian nafsu nu nyukma di alam hakékat lahir sareng hakékat batin tangtungan

jatidiri akma sareng sukma adam, ngabuah kadoliman, jadi amparan lampah upaya karuksakan dina

wangunan kahirupan akma – sukma adam.

Dajal, nyaéta kasajatian karuksakan nu ngusumah ( ngawaruga ) di alam syaré’at batin tangtungan

jatidiri jiwa adam salaku jalma/manusa makhluk bumi ( golongan sato/ homo sapiéns nu jadi

tutunggangan adam) khalifah bumi ( Ki Angon ) ngabuah karongkahan nu jadi amparan lampah

kanistaan dina wangunan kahirupan jiwana.

Kanistaan, nyaéta kasajatian dajal nu ngusumah ( ngawaruga ) di alam syaré’at lahir tangtungan

jatidiri raga adam salaku jalma ( manusa ) makhluk bumi ( golongan sato / homosapiéns )

tutunggangan adam khalifah bumi ( Ki Angon ). Ngabuah kacida nu jadi amparan lampah kiamah.

Kiamah, nyaéta ancur – ancuran ( karuksakan ) nu lahir tina lampah kacida wangunan karongkahan

amparan kadoliman, diadegkeun ku kabéngkokan wangunan nafsu angkara– tangtungan seuneu

kasajatian iblis nu hirup dina diri, hurip rumingkang dina nyawa urang, ngabuah naraka pikeun

hirup hurip urang. Hirup ngaraga jeung hurip ngajiwa rumingkang dina wujud kasajatian nanajis

jeung kakiruhan, babau jeung kakotoran, acak – acakan jeung paburantak, aing – aingan jeung

pakia– kia, nu ngalahirkeun keclakna cimata raga saripari hirup acining hurip lampah naraka, medalkeun

kanyeri, kapeurih, tunggara, sangsara jeung katalangsara ka diri jeung balaréa.

Nu jadi cukang lantaranna, ku ilangna amparan kasajatian, runtuhna tangtungan jatidiri, abrukna

wangunan kasajatian urang. Mangka sirna kahormatan ilang harga diri urang salaku diri jeung abdi

kaula adamna, salaku hamba jeung agamana, salaku kaum jeung kasukuanana, salaku anak bangsa

jeung nagarana, salaku umat manusa jeung bumi nu jadi ladang pangangonan tempat pangguyangan

lampahna anak incu adam.