cuplikan ''Lalakon Sang Hyang Nurcahya''

cuplikan ''Lalakon Sang Hyang Nurcahya''

Ti ; Ki Sura Situking

Sang Hyang Nurcahya nyarita yen anjeuna hoyong terang sorga.Danyang Haruta sareng Danyang Maruta ngadongeng yen sorga eta ayana dina hulu walungan anu pang ageungna di talatah Afrika.Sang Hyang Nurcahya percanten ka eta dongeng lajeng ngalalana milarian sorga nuturkeun eta walungan.

Sang Hyang Nurcahya papendak sareng paman jeung bibina,nyaeta putra putri Sang Hyang Adama anu kalima belas namina Sang Hyang Lata sareng Dewi Uzza nuju tatapa di sisi eta walungan,Sang Hyang Nurcahya nyarita yen anjeunna putrana Sang Hyang Sita,Sang Hyang Lata sareng Dewi Uzza nampi kadatangan Sang Hyang Nurcahya,lajeng diwuruk elmu kaweruh sadurung winarah sadaya lalakon anu parantos atawa bakal kasorang.

Lajeng Sang Hyang Nurcahya nereskeun milarian sorga dugi ka talaga Jambirilahiri di hulu walungan anu ayana di puncak Guhung Kaspia,Sang Hyang Nurcahya ngahuleg ngaraga meneng kaduhung ku bingung margina teu mendakan ayana sorga.

Aya sora tina jero kawah Gunung Kaspia anu api sareng latuna paling kolenyay murub mubyar,ngaku-aku yen mantena eta Gusti Amurba Bumi anu kagungan sora sareng naraka.eta sora dadamelan Danyang Azazil anu malih warni.Sang Hyang Nurcahya melesat ka jumantara ngadep Gusti Amurba Bumi nyuhun diweruhan ayana sorga.Sang Hyang Nurcahya lebet kana sosoca anu katelah Ratnadumilah,ningali kaendahan sadaya eusi sorga.

Saparantosna kaluar tina jero sosoca,Danyang Azazil anu malih warni jadi Gusti Amurba Bumi masihkeun Ratnadumilah ka Sang Hyang Nurcahya.Kasaktian eta sosoca teh sadaya anu dipicipta aya,anu dipikahayang datang,teu keuna ku tunduh,teu keuna ku laralapa.Lajeng Sang Hyang Nurcahya diwuruk elmu pangiwa panitisan,manjing suruping pati,lampahna cakramanggilingan.

Sang Hyang Nurcahya teu hayang mulang ka Kusniamalabari.Danyang Azazil nuduhan hiji talatah anu tiasa didunungan ku Sang Hyang Nurcahya anu katelah Lokadewa.Lajeng Sang Hyang Nurcahya angkat ka eta tempat.

Di Lokadewa Sang Hyang Nurcahya neraskeun tapana di pucuk gunung nuturkeun lampahna panon poe.Wayah janari nganghareup ka wetan,tengah poe nyanghareup kaluhur,wayah sareupna nyanghareup ka kulon.Lamina eta tatapa tujuh taun,dugi anjeuna ngaraga sukma lebet kana alam Sunyaruri awang-uwung,nyaeta alam Banujan,Sang Hyang Nurcahya dumunung di eta alam lamina sarebu taun.

Kocap kacarita aya hiji ratu banujan anu ngadanyangan Lokadewa namina Danyang Maladewa,putrana Danyang Harataketu.Anjeuna nuju ngider bumi ningali aya cahaya murub mubyar sanes surya gilang gumilang sanes bentang kadia sosoca sanes candra,nanging cahaya sukma trahna Sang Hyang Adama.

Dangyang Maladewa bade nyepeng eta cahaya nanging teu tiasa.Lajeng janten bandayuda ogol begalan pati sareng eta cahaya sukma anu ngaku aku Amurbamisesa Alam.Danyang Maladewa eleh taluk ka Sang Hyang Nurcahya,anu saterasna ngadeg ratu di Lokadewa sareng migarwa putrina Danyang Maladewa anu katelah Dewi Mahamuni.Sadaya kulawarga sareng wadiabala Danyang Maladewa sami ngdep taluk hamarikelu ka Sang Hyang Nurcahya anu kasebat Dewata nyaeta guru linuhung Lokadewa.Eta wiwitanna para dewa disebat Sang Hyang margi julukan anu diagem ku Sang Hyang Nurcahya.

Kocap kacarita Sang Hyang Nurcahya julukanana Sang Hyang Dewata,Sang Hyang Dewapamungkas,Sang Hyang Atmadewa,Sang Hyang Sukmakawekas,Sang Hyang Amurbengrat,Sang Hyang Manon,Sang Hyang Permana,Sang Hyang Permata,Sang Hyang Mahawidi,Sang HyangMahasidi,Sang Hyang Mahamulia,Sang Hyang Kahanantunggal,Sang Hyang Jagatmurtitaya,eta putrana Sang Hyang Sita,incuna Sang Hyang Adama.

Sang Hyang Nurcahya gaduh putra tunggal ti garwana Dewi Mahamuni,anu namina Sang Hyang Nurasa margi kasipta tina aworna cahaya sareng rahsa anu di siram Tirtamarta Kamandalu

Lalakon Sang Hyang Nurasa

Saparantosna Sang Hyang Nurasa dewasa,lajeng Sang Hyang Nurcahya ngawariskeun karaton ka putrana sareng masihan Cupumanik Astagina,Lata Maosadi,sareng Ratnadumilah,Sang Hyang Nurcahya lajeng nyipta Pustaka Darya,nyaeta seratan dina emutan,mantra tanpa sora,sora tanpa sastra,anu nyaritakeun lalampahan anjeuna.Pustaka Darya oge dipasihkeun ka Sang Hyang Nurasa

Cag